Ученик од Софија победи на европското финале на „Младите дебатираат“ во Берлин

Андреј Манов од 91. Германска јазична гимназија „Проф. Константин Галабов“ во Софија победи на европското финале на натпреварот „Jugend debattiert“ („Младите дебатираат“) во Берлин, соопшти Амбасадата на Бугарија во Германија, пренесува БНР.

На европското финале учествуваа 34 ученици од 16 европски држави, кои стигнале до завршната фаза на натпреварот.

Во финалната дебата, која се одржа на германски јазик, учесниците дискутираа на темата „За или против европска армија?“. Тие требаше да ја бранат својата позиција, да одговараат на аргументите на противниците и да го разгледуваат прашањето од различни гледишта.

Според бугарската амбасада, ова е трета година по ред во која бугарски претставник стигнува меѓу четворицата финалисти, а победата на Манов е втора за Бугарија.

Иницијативата постои во меѓународен формат од 2004 година и денес опфаќа млади од повеќе од 35 држави, од училишта во кои германскиот јазик се изучува како странски, како и од германски училишта во странство.