Ива Петрова: Нуклеарната енергетика бара долгорочни политики, доверба и подготвени кадри
Нуклеарната енергетика бара размислување надвор од политичките циклуси и рамките на одделните проекти и претставува долгорочна обврска што подразбира предвидливи политики, јавна доверба, подготвени кадри и одржливо финансирање. Ова го изјави министерката за енергетика на Бугарија Ива Петрова на 19-от Европски форум за нуклеарна енергија (ENEF) во Прага, јавува БТА.
Петрова истакна дека Бугарија има повеќе од 50 години искуство во нуклеарната енергетика и веќе спроведува стратегија за диверзификација. Паралелно се работи на изградба на нови нуклеарни капацитети на локацијата на АЕЦ „Козлодуј“ и се оценува потенцијалната улога на малите модуларни реактори.
Како клучни услови за реализација на идните проекти беа посочени предвидливата инвестициска средина, јасната распределба на ризиците и одговорностите, како и подготовката на нова генерација специјалисти. Петрова ја нагласи и важноста на јавната доверба и соработката со универзитетите во подготовката на кадри.
„За Европа да го искористи потенцијалот на малите модуларни реактори, мора да создадеме услови за стандардизација, повеќекратна примена на веќе потврдени проектни решенија и изградба на конкурентна индустриска екосистема“, изјави Ива Петрова.
Според неа, европската соработка може да го забрза развојот на индустрискиот капацитет, компетенциите и финансирањето, со истовремено признавање на придонесот на нуклеарната енергетика за енергетската безбедност, декарбонизацијата и конкурентноста на Европа.
БТА потсетува дека на 1 октомври Петрова изјави дека улогата на нуклеарната енергетика е стратешки избор за енергетската безбедност, конкурентноста и иднината на земјата.
