Малко Трново и Петрова Нива – места каде што се испреплетуваат историјата и природата на планината Странџа

Во срцето на планината Странџа, на само неколку километри од границата со Турција, се наоѓа Малко Трново – единствениот град во бугарскиот дел на планината. Опкружен со шуми, извори и ридови, овој град во југоисточна Бугарија е познат по своето богато историско и културно наследство, како и по зачуваната традиционална архитектура, пишува БНР.

Историјата на регионот датира уште од тракискиот период. Во околината на градот се откриени долмени и некрополи со погребни могили, а според археолозите Карел и Херман Шкорпил, на ова подрачје се наоѓала римската патна станица Утсургас.

Се претпоставува дека населбата Малко Трново настанала кон крајот на XVI или почетокот на XVII век, кога жителите на околните мали населби се населиле во близина на изворот познат како Големиот врис.

Меѓу најзначајните културни знаменитости на градот е Историскиот музеј „Проф. Александар Фол“, основан во 1983 година како „Музејски комплекс Странџа“, а преобразен во општински историски музеј во 2002 година.

Музејските поставки се сместени во традиционални куќи од периодот на бугарската преродба, кои се заштитени како културно наследство. Во нив се претставени археолошки наоди, икони од локални мајстори, традиционални носии, етнографски предмети и материјали поврзани со националноослободителните борби.

Историјата на Малко Трново е тесно поврзана и со револуционерното движење во регионот. По 1878 година, со Берлинскиот договор, Странџа останала надвор од границите на новоформираната бугарска држава. Во областа продолжиле да дејствуваат револуционерни комитети поврзани со Внатрешната македонско-одринска револуционерна организација (ВМОРО).

Особено значајно место во оваа историја зазема историскиот локалитет Петрова Нива, кој се наоѓа во близина на селото Стоилово, на околу 32 километри од Малко Трново.

На 29 јуни 1903 година, на Петрова Нива, ВМОРО донела одлука за организирање на Преображенското востание. На конгресот учествувале повеќе од 300 делегати, војводи и четници. За раководители на востанието биле определени Михаил Герџиков, капетан Стамат Икономов и Лазар Маџаров, додека Георги Кондолов бил избран за командант на вооружените сили.

Преображенското востание во Странџа започнало на 6 август 1903 година, на верскиот празник Преображение Господово, како дел од Илинденско-преображенското востание.

Денес на Петрова Нива се наоѓа меморијален комплекс со споменик посветен на учесниците и жртвите на востанието. Во рамките на комплексот има музејска поставка, а по повод 100-годишнината од востанието биле изградени и осветени параклисот и костурницата „Св. Петка“.

Меморијалниот комплекс Петрова Нива и Историскиот музеј во Малко Трново се вклучени во списокот на 100 национални туристички објекти на Бугарија.

Покрај историското значење, регионот привлекува внимание и со природните убавини. Во близина на меморијалниот комплекс се наоѓаат видиковци од кои се отвора поглед кон планинските предели и меандрите на реката Велека.

Природниот парк „Странџа“ е познат по своите пространи шуми, вековни дрвја, природни извори и бројни параклиси.

Малко Трново и Петрова Нива претставуваат две значајни туристички дестинации во југоисточна Бугарија, кои го поврзуваат историското наследство на регионот со природните особености на планината Странџа.