Во селото Цапари, Битолско, им беше оддадена почит на 214 бугарски офицери и војници погребани на бугарските воени гробишта

Споменот на 214 бугарски офицери и војници, погребани на бугарските воени гробишта во селото Цапари, Битолско, беше одбележан на Архангелова задушница, јавува БТА.

За време на Првата светска војна, селото Цапари се наоѓало на фронтовската линија, а крај селото биле погребани бугарските војници загинати во одбраната на Црвената Стена (кота 1248). Во март 1917 година, против бугарските дивизии започнала офанзива на петпати побројна војска на Антантата. Борбите траеле речиси три месеци и завршиле со победа на бугарската армија, а битката била наречена „Македонската Шипка“. Во 2004 година, гробиштата станале првите официјално признати бугарски воени гробишта на територијата на Северна Македонија.

„Нема ништо почовечно од тоа, кога ќе зачекориш на гробишта и ќе ги видиш крстовите, да почувствуваш тага. На ова свето место и на овие воени гробишта, во границите на нашата татковина и надвор од неа, јас чувствувам само гордост. Гордост поради тоа какви предци сум имал, гордост поради она што го направиле за нашата земја, гордост поради жртвата што ја принеле на олтарот на татковината. Гордост не само за мене, туку и за сите нас. Во право е поетот кога напишал дека сме синови на јуначко племе. Мажите што почиваат тука се пример за сите нас за тоа што би требало да бидеме подготвени да направиме. Живееме во време во кое од нас се бара да направиме многу помалку за својата татковина. Од нас се бара да дадеме многу помалку и треба да бидеме подготвени да го дадеме тоа, за нивната саможртва да не остане само пример пред кој ќе се поклонуваме. Не е доволно само да се поклонуваме. Оваа наша гордост треба да ја претвориме во дела“, им се обрати на присутните амбасадорот на Бугарија во Република Северна Македонија, Желјазко Радуков.

„За бугарскиот народ, сеќавањето на војниците е неразделен дел од националниот идентитет. Тоа нè поврзува со поколенијата што ја бранеле Бугарија и нè потсетува дека слободата, мирот и безбедноста не се даденост, туку вредности што мора да се бранат со одговорност, мудрост и решителност. Поклон пред загинатите бугарски војници и вечна им слава!“, рече во своето обраќање бугарската заменик-министерка за одбрана, Катерина Граматикова.

„Тука сум и за по 27 години да видам како ова место, на кое некогаш немаше ниту еден крст, сега е место за почит, место за сеќавање, место на достоинство и гордост. Треба да знаеме дека имаме долгови што мора да ги исполниме и да им оддаваме почит на оние што го дале својот живот за слободата на други Бугари, кои страдале под туѓа власт“, истакна во своето обраќање копретседателот на Заедничката историска комисија меѓу Бугарија и Северна Македонија и поранешен бугарски амбасадор во Скопје, проф. Ангел Димитров.

Пред споменикот на бугарските воени гробишта беа положени венци и цвеќе во име на министерот за одбрана и началникот на одбраната на Бугарија, бугарската амбасада во Скопје, Генералниот конзулат на Бугарија во Битола, копретседателот на историската комисија, воените аташеа на Италија, Украина, Кина, Хрватска и Велика Британија, Сојузот на ветераните од војните на Бугарија, како и во име на здруженијата на Бугарите во Северна Македонија.

Покрај заменик-министерката за одбрана Катерина Граматикова и амбасадорот на Бугарија во Северна Македонија Желјазко Радуков, на бугарските воени гробишта во селото Цапари присуствуваа и Људмил Михајлов, директор на Дирекцијата за социјална политика и политика за воено-патриотско воспитување при Министерството за одбрана на Република Бугарија; Станислав Генков, државен експерт во истата дирекција; бригадниот генерал Станчо Кајков, началник на Националниот воен универзитет „Васил Левски“; полковник Георги Георгиев, началник на Централниот воен округ (ЦВО) во Бугарија; потполковник Дилјан Петров, заменик-началник на штабот на ЦВО; генералниот конзул на Бугарија во Битола, Петар Петров; членовите на Заедничката историска комисија меѓу Бугарија и Северна Македонија; дипломати од бугарските дипломатски претставништва во Скопје и Битола; претставници на Сојузот на ветераните од војните на Бугарија и на бугарските здруженија во Северна Македонија.

Во црквата „Св. Ѓорѓи“ во Цапари беше отслужена панихида за загинатите, а бугарската делегација положи цвеќе и на надгробните споменици на седум бугарски офицери погребани во црковниот двор.

Вчера бугарската делегација положи венци и цвеќе и пред спомен-плочата на бугарските војници загинати во периодот од 1914 до 1918 година, на воените гробишта во Прилеп, каде што се погребани и австроунгарски, германски, романски, руски, турски, српски и албански војници. Делегацијата положи венци и цвеќе и пред споменикот на 193 бугарски офицери и војници во околината на селото Дреново, Општина Кавадарци, како и пред споменикот на загинатите бугарски офицери и војници во дворот на црквата во селото Беранци, Битолско.