Во Бугарија се отпуштени 11 повредени од верижните сообраќајни несреќи на автопатот „Тракија“

Вкупно 11 лица повредени во тешките верижни сообраќајни несреќи на автопатот „Тракија“ во Бугарија се отпуштени од болниците во Бургас, Сливен и Јамбол, додека 17 пациенти продолжуваат со болничко лекување, јавува БНТ.

Во Бургас се отпуштени четворица повредени, од кои тројца патувале со автобус, а еден управувал автомобил што учествувал во судирите. Во болницата остануваат тројца пациенти, од кои двајца се во тешка состојба. Меѓу нив има и романски државјанин.

Во Сливен се отпуштени петмина повредени, додека една жена, на барање на нејзините блиски, е префрлена во Софија. Во болницата остануваат 11 пациенти, од кои дел се очекува наскоро да бидат отпуштени.

Во Јамбол двајца повредени се пуштени на домашно лекување, а тројца сè уште се во болница.

Една од преживеаните патнички, Веселина Варбанова, раскажа за драматичните моменти за време на несреќата.

„Зад нас почнаа да се судираат други автомобили, а стаклата, седиштата и потпирачите во автобусот почнаа да се кршат врз нас. Не знаевме што да правиме, бидејќи вратите не можеа да се отворат“, изјави таа.

Меѓу отпуштените е и возачот Теодор Тодоров, кој успеал да излезе од тешко оштетениот автомобил и покрај повредите, по што се обидувал да ги предупреди другите возачи за опасноста.

На повредените им помагале и медицински работници кои се нашле на местото на несреќата, додека болничките екипи продолжуваат да се грижат за пациентите што сè уште се на лекување.