Националната уметничка академија во Бугарија одбележува 130 години со изложба во Берлин

Изложба со дела на професори од Националната уметничка академија во Бугарија ќе биде отворена на 17 ноември во 19 часот во Бугарскиот културен институт во Берлин, во рамките на одбележувањето на 130-годишнината од основањето на Академијата, јавува БНР.

Изложбата опфаќа дела од областа на плакатот, графиката, сликарството, скулптурата, сценографијата, текстилот, модниот дизајн, фотографијата, калиграфијата и дизајнот на компјутерски игри. Акцентот е ставен врз историјата на Академијата и нејзиното значење во современото образование и културата, а изложбата отвора простор за културен дијалог меѓу берлинската публика и бугарската современа уметност.

Академијата веќе ја одбележа годишнината со свеченост во Софија, а изложбата во Берлин е дел од продолжувањето на јубилејната програма.

Основана е во 1896 година како Државно училиште за цртање, во духот на преродбенската идеја за создавање уметничко училиште. Околу неа се обединиле истакнати творци и уметници, меѓу кои Иван Мрквичка, Константин Величков и Антон Митов.

Академијата имала клучно значење за културниот развој на Бугарија по ослободувањето. И денес, 130 години по основањето, продолжува да го поттикнува уметничкото творештво и активно да учествува во културниот живот на земјата.