Бугарската претседателка Илијана Јотова ја претставува Бугарија на 20-от самит на Франкофонијата во Камбоџа
Во главниот град на Камбоџа, Пном Пен, беше отворен јубилејниот 20. самит на Меѓународната организација на Франкофонијата, на кој Бугарија ја претставува претседателката Илијана Јотова, јавува БТА.
Учесниците на форумот ги пречекаа кралот на Камбоџа, Нородом Сихамони, генералната секретарка Луиз Мушикивабо, која е од Руанда, како и камбоџанскиот премиер Хун Манет и неговата сопруга, првата дама Чанмони. Последен им се придружи претседателот на Франција, Емануел Макрон.
Форумот започна со заедничка фотографија, на која претседателката Јотова беше една од трите жени во првиот ред.
Генералниот секретар на ОН, Антонио Гутереш, преку конференциска врска им се обрати на присутните во Меѓународниот конгресен центар „Чрој Чангва“ во Пном Пен.
По пристигнувањето на претседателката Илијана Јотова, првата дама на Камбоџа, Чанмони Хун Манет, ја придружуваше бугарската шефица на државата при посетата на Франкофонското село во Пном Пен, пренесе камбоџанската новинска агенција АКП.
За време на обиколката, Јотова, која слета на меѓународниот аеродром „Течо“ во Пном Пен, и сопругата на камбоџанскиот премиер Хун Манет ги разгледаа националните павилјони, културните поставки и уметничките изложби.
Тие имаа можност да се запознаат со традиционалниот кмерски вез „Сбај“, дел од културното наследство на Камбоџа, па дури и да се вклучат во неговата изработка, наведува АКП.
Темата на самитот во Пном Пен, кој беше отворен денеска, е „Повторно вложување во мирот за заеднички просперитет и трајна стабилност“, соопштија од прес-службата на претседателката Јотова.
Целта на форумот е да ги повика шефовите на држави и влади што учествуваат да ги поттикнат дијалогот, мирното решавање на споровите и одржливиот развој во корист на сите.
Бугарската претседателка ќе се обрати на воведната пленарна сесија и на затворената средба на шефовите на држави и влади под наслов „Зајакнување на мирот: Колективен проект што ја зема предвид разновидноста на нашите силни страни“, соопштија од прес-службата.
