Во бугарскиот град Самоков се одржува научна конференција по повод 230 години од раѓањето на иконописецот Димитар Зограф
Националната научна конференција „Димитар Зограф и неговото време“ беше отворена денеска во Самоков. Конференцијата е дел од националното одбележување на 230-годишнината од раѓањето на бугарскиот сликар Димитар Христов Зограф, брат на Захариј Зограф и татко на Станислав Доспевски.
На конференцијата учествуваат проф. Иванка Гергова, проф. Стефан Белишки, доц. Светозар Ангелов, Марија Полимирова и Дарина Бојкина – бугарски историчари на уметноста, реставратори и стручњаци за бугарската преродбенска уметност од првата половина на 20 век. Научните сесии се одржуваат на 19 и 20 ноември во хотелот „Гранд“ во Самоков.
Кустосот на Историскиот музеј во Самоков, Љубомир Николов, посочи дека Захариј Зограф станал симбол на бугарската иконографија, а другите творци од тоа време, за жал, останале во негова сенка. Нивното дело било потценето и малку познато. Според Николов, една од можните причини е тоа што Захариј бил иноватор и имал побунтовен дух.
Директорот на Историскиот музеј во Самоков, д-р Веселин Хаџиангелов, за БТА изјави дека годинава се одбележуваат и 90 години музејска дејност во градот.
Во рамките на одбележувањето, денеска во 18 часот во Историскиот музеј ќе биде отворена изложба со 22 паноа со репродукции на фотографии од икони, манастири и цркви. Ќе биде прикажан и документарниот филм „Димитар Христов“, посветен на животот и делото на сликарот. Сценариото е на кустосот Љубомир Николов, а режисери се Георги Банчев Помладиот и Георги Банчев Постариот.
На 20 ноември во 18 часот, во куќата на семејството Доспевски ќе биде отворена постојана музејска поставка посветена на градската култура на Самоков и на фотографијата. Програмата ќе продолжи на 21 ноември со детска ликовна работилница во Историскиот музеј, од 10 до 13 часот.
На 23 ноември претставници на музејот ќе отпатуваат во Рим, каде што во Бугарскиот културен институт ќе го претстават творештвото на Димитар Зограф и ќе го прикажат документарниот филм за неговиот живот и дело, снимен по повод годишнината.
Проектот се реализира со финансиска поддршка од Министерството за култура на Бугарија.
Димитар Христов Зограф е бугарски иконописец од времето на преродбата и еден од главните претставници на Самоковската уметничка школа. Роден е во 1796 година во Самоков. Тој е постариот син на Христо Димитров, кој се смета за основач на Самоковската иконописна школа. Иконописот го изучил во работилницата на својот татко. По неговата смрт во 1819 година, Димитар го презел раководењето со ателјето и ја продолжил соработката со манастирите, ктиторите и архитектите.
Во неговата работилница занаетот го изучил и помладиот брат Захариј Зограф. За разлика од Захариј, Димитар ретко ги потпишувал своите дела, поради што истражувачите тешко го утврдуваат авторството на голем број икони и фрески. Неговото творештво е посветено на православната црковна уметност. Зад себе оставил стотици икони и фрески за храмови и манастири во Самоков, Пловдив, Берковица, Враца и други места, како и за Рилскиот и Тројанскиот манастир.
Во 1822 година Димитар се оженил со Христијанија, со која имале седум деца. Еден од нивните синови бил Зафир, подоцна познат како сликарот Станислав Доспевски. Димитар Зограф починал на 9 октомври 1860 година.
