Адвокатот на жалителите во Стразбур: Судот не се изјасни за аболициите, туку за апликациите – нема простор за триумфализам кај Владата

Простор за триумфализам на Владата нема, а со решението на Стразбур не се одлучува дали важат или не важат аболициите дадени од претседателот Ѓорге Иванов. Вака адвокатот Влатко Илиевски за „Макфакс“ ја објаснува одлуката донесена од Европскиот суд за човекови права во Стразбур. Тој посочува дека откога Кривичниот суд, Апелација, па на крајот и Врховниот суд, ќе донесат пресуди за предметите, со што ќе се исцрпат сите правни лекови, ќе треба Стразбур да пресече за аболициите.

„Ова решение значи дека апликантите, односно жалителите, треба да ги исцрпат првин тука сите правни лекови пред националните судови за да може по добивање на конечната пресуда, каква и да е таа, да одлучат дали ќе поднесат нова апликација во Стразбур или нема да поднесат. Оваа одлука денеска е решение, со оваа одлука не се решава мериторно по однос на суштината на барањето (поништувањето на дадените аболиции од Иванов), туку од процедурален аспект се одбива како преуранета. Од тие причини сметам дека нема простор за голем триумфализам кај Владата дека е одлучено во нивна полза. Едноставно, треба да почека да се исцрпат сите правни лекови“, објаснува Илиевски за „Макфакс“.

Сепак, адвокатот посочува дека домашните судови ќе ги земат предвид аргументите, кои се дел од апликацијата доставена пред Стразбур, а во која се наведува дека еднаш дадена аболиција од претседател на држава не може да се поништи и таа е важечка.

„Можам само да изразам надеж дека националните судови ќе ги земат предвид сите аргументи што беа изнесени во апликацијата и дека ќе ги имплементираат соодветно во пресудите што претстојат“, додава Илиевски за „Макфакс“.

Според адвокатот, ова е шанса Врховниот суд да се произнесе по однос на валидноста на аболициите.

Прашан дали решението значи дека не е одлучено по прашањето дали аболициите се важечки или поништени, адвокатот Влатко Илиевски вели: „Да, не се одлучува по однос на тоа прашање“.

Претходно, Судот за човекови права во Стразбур донесе решение, во кое посочува дека апликациите за дадените и поништени аболиции од претседателот Ѓорге Иванов за четирите случаи на Специјалното јавно обвинителство се преуранети. Ова е донесената одлука во форма на решение наместо пресуда по шест години од апликацијата. Според Стразбур, во тек се судските процеси за четирите предмети, па сметаат дека тие може да донесат пресуда откога ќе се исцрпат сите правни лекови во Македонија.