Албанската писателка Леа Ипи ја прими наградата „Букстар“ 2026 за мемоарската книга „Слобода“
Позната албанска писателка Леа Ипи на 24 август гостуваше во „Лабораториум“ во Скопје, каде што и беше доделена наградата „Букстар“ 2026 за книгата „Слобода“ во издание на „ИЛИ-ИЛИ“.
Програмата започна во 18 часот со подкастот „Антологџии“, во кој ќе учествуваа познатиот македонски преведувач и поет Душко Крстевски и авторката Леа Ипи. Потоа Ивана Трајаноска го претстави образложението за доделувањето на наградата.
По доделувањето на самата награда се одржа разговорот „До слободата и по неа“, модериран од Калина Малеска. Настанот заврши со средба со авторката и потпишување книги.
„Слобода“ е моќна мемоарска книга во која се истражува сложената и бурна патека на растењето и созревањето во посткомунистичка Албанија. Како млада ученичка, Ипи била воспитувана под строгиот режим на тоталитарна власт која им ветувала на своите граѓани иднина во совршена слобода. Но, кога падна режимот во Албанија, основите на нејзиното општество се урнаа и светот на Ипи беше изненадно прекинат. Нејзината приказна ги води читателите низ период на интензивни лични и политички превирања, додека таа го сведочи распадот на комунизмот, појавата на неолиберализмот и своето сопствено созревање.
Со живо раскажување и длабоки размислувања, Ипи ја истражува длабоката контрадикторност на концептот на слободата, идентитетот и цената на промените. Со прониклив поглед на пресекот помеѓу личното и политичкото, „Слобода“ поставува суштински прашања: Што е вистинска слобода? Како историските и политичките сили ги обликуваат нашите животи, дури и од детството? Уникатната перспектива на Ипи нуди интимно и интелектуално истражување на тоа што значи да бидеш слободен, и во теоријата и во реалноста.
Книгата ја доби наградата „Ондатје“ од Кралското книжевно друштво, наградата „Слајтли Фокст“ за најдобро прво биографско дело, беше во најтесен избор за наградите „Коста“, „Бејли Гифорд“ и „Гордон Бирн“. За книга на годината ја прогласија Њујоркер, Вашингтон пост, Фајненшел тајмс, Тајмсовиот книжевен додаток, Форин аферс, Сандеј тајмс и др.
Леа Ипи e родена 1979 година во Драч, Албанија Taa e универзитетски професор, предава политичка теорија на Лондонската школа за економија (London School of Economics). Студирала филозофија и литература на римскиот универзитет „Сапиенца“, а докторирала на Европскиот универзитетски институт (EUI) во Фиренца. Полето на нејзиниот научен интерес ја опфаќа нормативната политичка теорија, политичката мисла на Просветителството (Кант), се занимава со марксизам, критичка теорија, национализам, интелектуална историја на Балканот (особено на Албанија). Неодамна британскиот магазин „Проспект“ ја вброи меѓу десетте најзначајни светски мислители.
