Амбасадата на САД и Бугарскиот Црвен крст разговараа за безбедноста на странските државјани во Бугарија

Конзуларниот тим на Амбасадата на САД во Софија се состана со претставници на Бугарскиот Црвен крст, други дипломатски мисии и Конзуларното здружение за подобрување на координацијата и подготвеноста за вонредни ситуации што ги засегаат странските државјани во Бугарија, соопшти американската амбасада.

„Тесно соработуваме со нашите бугарски партнери за американските државјани во Бугарија да добиваат навремени, веродостојни и потенцијално животоспасувачки информации“, се наведува во соопштението.

Бугарскиот Црвен крст ги претстави своите главни активности и услуги, меѓу кои реагирање при катастрофи и кризи, спасување на вода и на планина, прва помош и обуки за основни постапки за спасување живот, како и поддршка за лицата погодени од вонредни ситуации.

Учесниците разменија практични совети за безбедно однесување покрај водни површини, спречување несреќи на планина и правилно постапување во вонредни ситуации.

Амбасадата ги повика американските државјани што патуваат или живеат во Бугарија да се регистрираат во програмата Smart Traveler Enrollment Program (STEP) преку step.state.gov за да добиваат безбедносни известувања. Во објавата се потсетува и дека во итни случаи треба да се повика бројот 112.