Археолози открија монументална градба и сребрени монети во средновековниот град Русокастро кај Бургас

Монументална средновековна градба и бројни вредни наоди открија археолози од Бургас при ископувањата на тврдината Русокастро. Откритието е направено на самиот крај од годинашната археолошка сезона и дава нови информации за уредувањето и животот во средновековниот град, пишува БНТ.

Градбата се наоѓа во близина на внатрешниот јужен тврдински ѕид. Широка е 7,60 метри, а нејзината должина сè уште не е утврдена. Ѕидовите се дебели 1,10 метри и се изградени од камења поврзани со малтер.

Особено интересен е внатрешниот малтерски слој, изработен од дебел слој розов водонепропустлив малтер. Според археолозите, тоа укажува дека просторијата веројатно се користела како резервоар за вода или складиште за прехранбени резерви.

Се претпоставува дека откриените остатоци се од долното ниво на двокатна градба, сместена во централниот кварт на средновековниот град. Горниот кат најверојатно служел за живеење.

Покрај архитектонското откритие, археолозите пронашле и голем број вредни предмети. Меѓу нив се сребрени монети на бугарскиот цар Иван Александар, венецијански сребрени грошеви, познати како матапани, како и бројни бакарни монети. Наодите веќе се чистат и обработуваат во реставраторското ателје на Регионалниот историски музеј во Бургас.

Археолошките истражувања на Русокастро ги организира и спроведува Регионалниот историски музеј во Бургас, со финансиска поддршка од Советот на министри и Општина Камено.

Средновековниот град е вклучен во списокот на приоритетни археолошки локалитети што државата ги поддржува со цел зачувување на културното наследство и развој на културниот туризам во Бугарија.