Балканскиот театарски фестивал во Благоевград ќе собере театарски трупи од пет држави

Благоевград од 1 до 7 ноември ќе биде домаќин на петтото издание на Балканскиот театарски фестивал, на кој ќе учествуваат театарски трупи од Бугарија, Северна Македонија, Романија, Словенија и Србија, јавува Пиринско.

Годинешната селекција обединува режисери со различен сценски израз, а програмата е насочена кон теми поврзани со слободата, власта, меморијата, личниот избор и влијанието на средината врз човекот.

Фестивалот ќе започне на 1 ноември со претставата на отворено „Карневал на огнот“, создадена од Драмскиот театар „Никола Вапцаров“ во партнерство со театарот Fireter. Истата вечер ќе биде изведена „Слики од една егзекуција“ од Хауард Баркер, во продукција на Драмско-куклениот театар „Иван Радоев“ од Плевен, во режија на Стајко Мурџев, со Радина Карџилова во главната улога. По претставата е предвиден разговор со трупата.

На 2 ноември програмата продолжува со „Ние двајцата и Алоиз“, по што публиката ќе може да разговара со артистите и авторскиот тим.

На 3 ноември ќе биде изведена претставата „Домот на нашите соништа“. Истиот ден ќе се одржи и Режисерската берза, која им овозможува на млади режисери да ги претстават своите идеи пред професионална театарска средина.

На 4 ноември на програмата е „Лицето на ближниот“ според Ф. М. Достоевски, во режија на Маргарита Младенова. Во салата „Николај Кимчев“ ќе биде прикажана и „Непорочната“ на Драмата при Словенечкиот народен театар од Марибор.

На 5 ноември публиката ќе ја проследи „Второстепени божици“ од Александра Фелсеги, во режија на Андреј Маџери. Во паралелната програма е предвидена и проекција на „Федра“, во режија на Ливија Пандур.

На 6 ноември ќе биде изведена „Борба за опстанок“ на словенечкиот режисер Јернеј Лоренци. По претставата е предвиден разговор со творечкиот тим.

Фестивалот ќе заврши на 7 ноември со „Божества“, по што на отворено ќе биде изведена претставата „Драгониус“ на театарот Fireter.

По секоја претстава од главната програма публиката ќе има можност да разговара со творечките екипи.

Балканскиот театарски фестивал го организира Драмскиот театар „Никола Вапцаров“ со финансиска поддршка од Министерството за финансии, во партнерство со Општина Благоевград.