Белобрадова во Кочани: Треба да им кажеме на властите во Северна Македонија дека човековите права се нераскинлив дел од стремежот да се биде дел од Европа

Бугарски пратеници присуствуваат на рочиштето во Кочани против Ива Михаилова за да ѝ дадат психолошка поддршка и да го следат почитувањето на човековите права, а не за да ја коментираат судската постапка, изјави бугарската пратеничка Елисавета Белобрадова, јавува БТА.

Белобрадова, која е заменик-претседател на Комисијата за политиките за Бугарите надвор од земјата, е меѓу пратениците од различни парламентарни групи кои пристигнаа во Кочани за четвртото по ред рочиште во постапката против Михајлова.

„Не сме тука за да го коментираме случајот. Не сме тука за да коментираме што се случува во судницата. Единствено сме тука, јас и моите колеги од различни парламентарни групи, за психолошки да ја поддржиме Ива Михаилова, да знае дека државата е со неа и, пред сè, да го следиме почитувањето и заштитата на човековите права“, рече Белобрадова.

Таа изрази надеж дека „сè ќе заврши во согласност со законите и правото“.

Ива Михаилова има бугарско и македонско државјанство и е обвинета за тешко кривично дело поврзано со безбедноста во сообраќајот во Северна Македонија.

На прашањето дали треба да се бара меѓународна заштита, Белобрадова оцени дека тоа не треба да се прави преку мешање на државни институции од други земји. Таа нагласи дека Северна Македонија е суверена држава со независна судска власт.

„Секој политички коментар во овој случај, според мене, би наштетил. Единственото што треба да го кажеме е дека во секој случај треба да ја поддржиме Ива со сè што можеме“, изјави Белобрадова.

Според неа, за случајот треба да се разговара со европските институции и со властите во Северна Македонија, со порака дека „човековите права се нераскинлив дел од стремежот да се биде дел од Европа“.