Битиќи на Преспа форум дијалог: Договорот од Преспа ги урна бариерите, создаде позитивна траекторија за економски развој
Заменик-претседателот на Владата на Република Северна Македонија задолжен за економски прашања, координација на економските ресори и инвестиции, Фатмир Битиќи, имаше воведно обраќање на панел дискусијата „Трасирање на патот кон просперитет: EcoFin стратегии за раст на Западен Балкан“, во рамките на Преспа форумот за дијалог 2023.
„Важно е да потсетиме дека во изолација нема просперитет, има само алчност и тврдоглавост. Токму поради тоа што го направивме пред пет години, денес сме собрани овде на овој Преспански Форум за дијалог за да славиме, но и да се потсетиме на постулатите за напредок и просперитет.
Договорот од Преспа отвори ново поглавје во регионот, отворајќи го патот кон просперитет и стабилност. Покрај унапредувањето на дипломатските односи и соработката меѓу Грција и Северна Македонија, го поттикна и економскиот раст и промовираше прекугранични иницијативи меѓу двете земји. Понатаму, договорот од Преспа имаше домино ефект и во поширокиот балкански регион“, рече Битиќи.
Според него договорот од Преспа го отворил патот кон просперитетот со отстранување на бариерите, поттикнување на соработката и инспирација на другите народи.
„Создаде позитивна траекторија за економски развој, политичка стабилност и регионална интеграција, носејќи трајни придобивки за Грција, Северна Македонија но и за целиот регион на Западен Балкан, додаде Битиќи.
