Богатата бугарска колекција во Библиотеката на Конгресот на САД сведочи за долгогодишна културна соработка

Бугарија е претставена во Библиотеката на Конгресот во Вашингтон со една од најбогатите национални колекции надвор од земјата, создадена преку размена, донации, набавки и партнерство што продолжило и во периоди на политички тензии, јавува БНР.

Првите бугарски изданија во библиотеката се „Псалтир“ и „Битие“ од 1857 година и „Новиот Завет“ од 1850 година, внесени во каталогот уште во 1861 година. Организираната размена започнала кон крајот на XIX век, а во 1946 година Бугарија и САД потпишале договор за размена на официјални документи, книги и периодични изданија.

Еден од највредните фондови е приватната колекција на Тодор Плочев, купена од библиотеката во 1949 година. Таа содржи околу 700 наслови, меѓу кои „Кириакодромион“ на Софрониј Врачански, „Рибниот буквар“ на Петар Берон и „Бугарска граматика“ на Неофит Рилски.

„Мислам дека колекцијата е исклучително важна за вашата култура и историја“, изјави библиотекарката Анџела Кенон, додавајќи дека бугарските посетители секогаш се воодушевени кога ќе ги видат овие изданија.

Колекцијата вклучува и публикации на бугарските иселеници во САД, како и материјали што ги одразуваат различните заедници во Бугарија. Библиотеката на Конгресот секоја година добива околу 3.000 материјали од Бугарија, збогатувајќи ги знаењата за бугарската историја, култура и општество.