Борисов пред еврокомесарот Брунер: Бугарија ја чува границата на цела Европа

Шенген е едно од најголемите достигнувања на ЕУ. За да го зачуваме, мора да го обновуваме – преку модерни технологии, безбедни надворешни граници и солидарност меѓу државите. Бугарија има клучна улога во тоа. Ја чуваме границата не само за нас, туку и за цела Европа. Ова го изјави лидерот на ГЕРБ, Бојко Борисов, кој во Софија го пречека еврокомесарот за внатрешни работи и миграции, Магнус Брунер, јавува БГНЕС.

За време на средбата, двајцата разговараа за улогата на Бугарија во Шенген, обезбедувањето на надворешните граници и спроведувањето на Пактот за миграција и азил.

„Бугарските граѓани веќе ги гледаат придобивките од Шенген. Ова беше одамна очекуван чекор, што директно го засега животот на над 450 милиони Европејци – полесно патување, повеќе можности, помалку бирократија“, изјави Бојко Борисов.

Лидерот на ГЕРБ е категоричен дека Бугарија не е само дел од Шенген, туку и негов чувар.

Денес еврокомесарот Брунер ќе се сретне со премиерот Росен Желјазков и министерот за внатрешни работи Даниел Митов. Подоцна, министерот за внатрешни работи ќе го однесе Брунер и грчкиот заменик-министер за миграција и азил, Севи Волудаки, на граничниот премин Кулата – Промахон.