„Бранд Бугарија“ асоцијација за промоција на Бугарија како дестинација за инвестиции и туризам

Поранешниот министер за туризам и поранешен заменик-градоначалник на Софија Мирослав Боршош ќе ја предводи асоцијацијата „Бранд Бугарија“, чија цел е изработка на единствена национална стратегија за меѓународно промовирање на Бугарија, како модерна и конкурентна дестинација за инвестиции, туризам и партнерства преку заедничка бранд-стратегија и единствен комуникациски и визуелен стандард.

Во активностите на асоцијацијата се планирани меѓународни бизнис и инвестициски форуми, национални павилјони на саеми, културна дипломатија и платформа за поддршка и сертификација на бугарски брендови.

Иницијативата ќе ги обедини институциите, бизнисот, локалните власти и академската заедница и има за цел да биде координатор меѓу јавниот и приватниот сектор со фокус на зголемена меѓународна видливост.

Според Боршош, Бугарија има значаен потенцијал во културата, иновациите, туризмот и човечкиот капитал, а „Бранд Бугарија“ е чекор кон јасен национален идентитет и современото претставување на земјата пред светот.