Бугарија го заврши преземањето на Институтот за историја на бугарската емиграција во Северна Америка „Илија Тодоров Гаџев“ во Гоце Делчев

Бугарската држава ја заврши постапката за преземање на Институтот за историја на бугарската емиграција во Северна Америка „Илија Тодоров Гаџев“ во градот Гоце Делчев, соопшти министерот за култура Евтим Милошев на седница на парламентарната Комисија за култура и медиуми, јавува БТА.

Милошев изјави дека архивот претставува значаен извор за бугарската историја и емиграцијата во Северна Америка, додавајќи дека дел од архивската граѓа сè уште се наоѓа во САД и допрва треба да биде пренесена во Бугарија.

„Архивот е многу повеќе од музејска збирка. Тој дава огромен увид во процесите поврзани со создавањето на оваа емиграција, особено во Америка“, рече Милошев.

Прашањето за статусот на институтот го постави пратеникот Стојан Тричков од „Прогресивна Бугарија“, кој оцени дека архивот содржи сведоштва за животот и судбините на Бугарите од Македонија.

Според Милошев, од овој момент процесот ќе продолжи во административна рамка, а преземањето на институтот го оцени како значаен придонес за зачувување на бугарската историска меморија.