Бугарија и Франција ја продлабочуваат соработката во сферата на одбраната

Министерот за одбрана на Бугарија Димитар Стојанов се сретна со амбасадорката на Франција во Бугарија, Мари Де Мулен, со која разговараше за развојот на билатералната соработка во областа на одбраната, модернизацијата на вооружените сили на Бугарија и проширувањето на индустриското партнерство меѓу Софија и Париз.

Стојанов ги претстави мерките на бугарската влада за исполнување на обврските кон НАТО и за модернизација на армијата, вклучително и преку европскиот механизам SAFE. „Планот за достигнување 5% од БДП за одбрана до 2035 година веќе е факт. Работиме и на стекнување нови способности и на изградба на потребната инфраструктура за нивна ефикасна употреба“, изјави министерот.

Главни теми на средбата беа заедничките проекти за набавка на нови трикоординатни радари, 155-милиметарски самоодни хаубици CAESAR, како и спроведувањето на договорот за зенитни управувани ракети VL MICA за Военоморските сили.

„Бугарија има добро партнерство со Франција во сферата на одбраната. Се надевам дека со истото темпо со кое работиме на проектот за нови трикоординатни радари ќе продолжиме и со останатите заеднички проекти“, нагласи Стојанов.

Тој посочи дека учеството на бугарската одбранбена индустрија во идните иницијативи е еден од најважните приоритети. Според него, вклучувањето на бугарските компании е важен услов за развој на националниот одбранбен капацитет.

Амбасадорката Де Мулен ја потврди подготвеноста на Франција да продолжи со заедничката работа со Бугарија за зајакнување на колективната безбедност и одбранбените способности на Европа.

Двете страни разговараа и за обновување на стратегискиот дијалог во областа на одбраната, за што треба да бидат преземени чекори уште годинава.