Бугарскиот диригент Дружељуб Јанакиев добитник на музичка награда на кантонот Берн

Бугарскиот диригент и виолинист Дружељуб Јанакиев е меѓу добитниците на Музичките награди на швајцарскиот кантон Берн за 2026 година, за придонесот кон музичкиот живот во регионот, објави Радио Бугарија. Наградите ќе бидат врачени на 17 ноември во театарот „Небиа“ во Бил/Биен.

Признанието ја истакнува неговата работа во поврзувањето на класичната музика со современи жанрови и други уметности. Од 2008 година Јанакиев е диригент и главен уметнички раководител на симфонискиот оркестар Variaton Projektorchester во Берн, во кој настапуваат професионалци, студенти и искусни музичари аматери.

„Не ми е целта да бидам ексцентричен. Едноставно ме интересира самото спојување“, вели Јанакиев во интервјуто за Радио Бугарија. Според него, поврзувањето различни уметности придонесува и за поврзување на нивната публика.

Неговите проекти вклучуваат спојување на музиката на Малер со рок-групата Kummerbuben, а следниот предвидува изведба на „Посветување на пролетта“ од Стравински со прогресивната метал-група Sonorous Dynamo.

Јанакиев е роден во Софија, во музичко семејство, а во средината на деведесеттите години заминал на студии во Швајцарија. Завршил виолина во Берн и симфониско и оперско диригирање во Цирих, кај професорот Јоханес Шлефли. Настапувал со бројни оркестри во Бугарија и во странство, а соработувал и со Теодосиј Спасов.

Во интервјуто тој ја нагласува важноста на музичкото образование што го стекнал во Бугарија и влијанието на своите учители Јосиф Радионов и Венцислав Николов врз неговиот професионален развој.