Бугарија и Германија разговараа за нови партнерства и зголемување на бројот на туристи

Бугарскиот министер за туризам Илин Димитров во Берлин оствари средби со претставници на две водечки германски туристички организации, на кои се разговараше за нови деловни партнерства, подобрување на туристичките услуги и зголемување на бројот на германски туристи во Бугарија, соопшти бугарското Министерство за туризам.

Во бугарската амбасада во Берлин, Димитров се сретна со Јана Шимке, извршен директор на Германското здружение на хотелиери и угостители (DEHOGA), и Свен Либерт, генерален секретар на Сојузното здружение на германската туристичка индустрија (BTW).

На средбите беа разгледани можностите за размена на искуства во категоризацијата на сместувачките капацитети, професионалната квалификација и справувањето со недостигот од работна сила во туристичкиот сектор.

Посебно внимание беше посветено на воспоставувањето контакти со нови туроператори и авиокомпании, со цел подобрување на воздушната поврзаност и привлекување повеќе германски туристи во Бугарија.

Димитров ги покани двете организации да организираат настан во Бугарија за нивните членови, со цел директно поврзување со бугарските туристички компании. Од BTW, пак, доби покана да учествува на годишниот самит на германската туристичка индустрија, закажан за 31 мај 2027 година во Берлин.

Според претходните најави на бугарското Министерство за туризам, во 2027 година се очекува раст од 25 до 30 проценти на бројот на германски туристи. За следната година веќе се договорени дополнителни 150.000 до 160.000 авионски седишта од Германија кон Бугарија.