Бугарија и Северна Македонија потпишаа договор за изградба на тунелот на железничкиот Коридор бр. 8

Министрите за транспорт на Бугарија и Северна Македонија денеска потпишаа спогодба за изградба на железнички тунел што ќе ги поврзува двете држави, јавува БГНЕС.

Проектот за изградба на железнички тунел по линијата е клучен елемент од Коридор бр. 8, кој има за цел да обезбеди транспортно поврзување меѓу Црното Море и Јадранското Море.

Церемонијата се одржа симболично на станицата Ѓуешево точно напладне, каде што министерот за транспорт Гроздан Караџов пристигна со воз и го потпиша документот заедно со својот македонски колега Александар Николоски. Спогодбата предвидува завршување на сите активности за изградба на железничката траса меѓу двете земји.

Во моментот станицата Ѓуешево е крајната точка на активната линија од бугарска страна. Претстои изградба на делница до тунел со должина од околу 2,4 километри, кој ќе минува рамномерно низ територијата на Бугарија и Северна Македонија.

Николоски увери дека од македонска страна градежните работи напредуваат според планот. Вицепремиерот Караџов истакна дека проектот е одложуван повеќе од еден век, но се очекува железничката врска да биде целосно завршена во текот на следните две години.

Реализацијата на трасата ќе придонесе за економскиот и финансиски развој на регионите од двете страни на границата.

„Ова е многу посакуван проект од страна на сите наши сограѓани, особено од луѓето кои тука, кога железницата пристигнува во 1942 година, сите се надеваат дека таа ќе продолжи. Но од 1942 година – 83 години подоцна – таа останува до тука, до оваа станица. На неколку метри од местото каде што е запрен возот, линијата прекинува. И еве денес, по толку многу години, првпат, повеќе од еден век подоцна, се собираме, и нам со колегата Николоски ни припадна честа да го возобновиме започнатото“, додаде Караџов.