Бугарија потпиша договор за користење на турските терминали за гас

Бугарија денеска доби пристап до турските терминали и мрежата за транспорт на гас како дел од долгорочниот договор што ќе ѝ помогне на земјата да ја намали зависноста од Русија за гас. Бугарската државна компанија за гас Булгаргаз и турската компанија за транспорт на гас Ботас потпишаа 13-годишен договор со кој Бугарија ќе добие пристап до турските терминали за течен природен гас.

Бугарскиот министер за енергетика Росен Христов рече дека договорот го решава проблемот со недостигот од инфраструктура во Бугарија за истовар на течен природен гас, пишува мкд.мк.

Бугарија, која беше речиси целосно зависна од рускиот гас пред инвазијата на Москва во Украина, бара алтернативни патишта за испорака на гас по разумни цени откако Русија ѝ го прекина снабдувањето во април, бидејќи Софија одби да го плати гасот во рубли, руската валута.

Според сегашниот договор, течниот природен гас што Бугарија ќе го купува на меѓународните пазари ќе се истоварува и преработува на турските терминали за ЛНГ, а потоа преку гасната мрежа Ботас ќе се пренесува во Бугарија.

Договорот предвидува дека годишно од Турција во Бугарија ќе се пренесуваат до 1,5 милијарди кубни метри природен гас.

Бугарија веќе има потпишано долгорочен договор со Азербејџан за речиси една милијарда кубни метри природен гас, кој го добива преку турската гасоводна мрежа.

За другите потреби на Бугарија, од Грција се увезуваат нешто повеќе од 3 милијарди кубни метри годишно.