Бугарија промовира водич за значајните христијански маршрути – нов поттик за развој на поклоничкиот туризам

За време на Првата национална конференција посветена на поклоничкиот туризам во Бугарија, во присуство на министерот за туризам Мирослав Боршош и Западно- и Средноевропскиот митрополит Антониј, како и претставници од духовништвото и туристичкиот сектор, беше промовиран водич за најзначајните христијански маршрути во земјата, јавува БГНЕС.

Изданието опфаќа десет поклонички локалитети, меѓу кои духовни и културни светилишта – манастири, цркви и места со историско значење за христијанството во Бугарија. Во водичот се вклучени маршрути низ Софија и Софиската Света Гора, Тракиската Низина и Родопите, Розовата Долина, Северозападна Бугарија и други региони. Покрај историската содржина, водичот нуди и информации за туристички патеки, со цел да ги поттикне културно-духовните патувања.

Министерот Боршош истакна дека поклоничкиот туризам во Бугарија се развива стабилно не само како верско, туку и како културно патување, кое одговара на барањата на современиот турист за подлабоко и смислено доживување. „Бугарија има потенцијал да се утврди како водечка дестинација за поклонички туризам, бидејќи спојува длабоки духовни традиции со богато културно наследство“, нагласи министерот. Тој додаде дека новите генерации посетители сѐ повеќе бараат лична врска со историјата и верата, а токму поклоничките маршрути го овозможуваат тоа – патување кон себеси преку верата и културата.

Во таа насока, Министерството за туризам најави формирање работна група со претставници од Бугарската православна црква, традиционалните верски заедници во земјата, академската заедница, локалната власт и туристичкиот сектор, која ќе работи на промоција на овие маршрути како во земјата, така и во странство.