Бугарија се приклучи на европската иницијатива „EastInvest“
Бугарија се приклучи на финансиската иницијатива на Европска комисија „EastInvest“, насочена кон земјите од ЕУ што граничат со Русија, Белорусија и Украина. Програмата, најавена од Урсула фон дер Лајен, има цел да ги ублажи економските и инфраструктурните последици од војната во Украина и да ја забрза економската отпорност и интеграцијата во внатрешниот пазар.
Во иницијативата учествуваат девет држави: Бугарија, Финска, Естонија, Латвија, Литванија, Полска, Словачка, Унгарија и Романија, во соработка со Европска инвестициона банка, Европска банка за обнова и развој и национални развојни банки, меѓу кои и Бугарска банка за развој.
Предвидено е мобилизирање до 28 милијарди евра јавни и приватни инвестиции за транспортна и енергетска поврзаност, зелена и дигитална трансформација, стратешка инфраструктура, безбедност на синџирите на снабдување и поддршка на малите и средни претпријатија.
За време на посетата во Брисел, министерот Ангелина Бонева изјави дека Бугарија има мандат да го забрза приклучувањето кон механизмот за земјата навремено да ги искористи новите финансиски можности.
