Бугарија во Брисел претстави патоказ за завршување на железничкиот Коридор 8
Бугарија и Северна Македонија го потврдија својот ангажман за финализирање на недостасувачките железнички делници на Коридор 8. На средба во Брисел, организирана од ГД „Проширување и источно соседство“ (DG ENEST) при ЕК, беа одржани разговори помеѓу претставници на министерствата за транспорт на двете држави, соопштија од прес-центарот на Министерството за транспорт, пренесува БГНЕС.
Бугарската страна претстави патоказ за завршување на железничкиот Коридор 8 на бугарска територија, при што беа утврдени клучни фази, вклучително и повторно започнување од страна на Република Северна Македонија на тендерот за градежни работи на делницата помеѓу Крива Паланка и влезот на прекуграничниот тунел до крајот на 2025 година. За недостасувачката делница од 2,4 км на бугарската страна на границата – од Ѓуешево до влезот на прекуграничниот тунел, како и за линијата Перник – Радомир, документите за започнување на постапки за градежни работи се изготвени и доставени за одобрување во Агенцијата за јавни набавки.
Во однос на заедничкиот проект за изградба на прекуграничниот тунел помеѓу Ѓуешево и Деве Баир, двете страни се договорија да формираат работни групи кои до крајот на јули ќе го финализираат текстот на меѓувладиниот договор, предложен од Бугарија на 15 јануари 2025 година. Се очекува потпишувањето на Договорот да се случи оваа есен, што би го отворило патот за започнување на градежните работи. Бугарските претставници изразија загриженост дека сѐ уште не се пристигнати коментари по нацртот на Договорот од страна на Република Северна Македонија за изградба на прекуграничниот тунелски објект, што може да го осуети неговото потпишување. Бугарската страна потенцира дека очекува во најкраток рок забелешки и предлози за измени, доколку ги има, од нашата југозападна соседка.
За време на средбата, двете страни се обврзаа да ги проучат најсоодветните можности за аплицирање за финансирање од ЕУ или други финансиски институции за заедничката изградба на тунелот.
На средбата учествуваа заменик-министерот за транспорт и врски Љубен Нанов, шефицата на кабинетот на министерот за транспорт и врски Катерина Граматикова-Иванова и генералниот директор на НК „Железничка инфраструктура“ Александар Вецков. Претставници на Северна Македонија беа државниот секретар на министерството за транспорт Стефан Волкановски, како и Синиша Ивановски, директор на претпријатието за железничка инфраструктура.
