Бугарија започнува нов проект за модернизација на своите вооружени сили со набавка на седум воени бродови од Белгија и Холандија

Бугарската влада одобри спогодба меѓу Бугарија, Белгија и Холандија за набавка на седум воени бродови-миноловци, со што официјално започнува уште еден проект за превооружување и модернизација на вооружените сили. Ова по завршувањето на седницата на владата го соопшти министерот за одбрана Атанас Запрјанов.

Четири од бродовите ќе бидат обезбедени од Белгија, а три од Холандија. Самите пловни објекти се доделуваат бесплатно. Вкупниот износ за нивно целосно враќање во борбена готовност ќе изнесува 42 милиони евра и ќе се распредели во период од следните четири години.

Првиот брод се очекува да пристигне уште во текот на оваа година. Во моментов, Военоморските сили на Бугарија веќе располагаат со три вакви бродови од истите земји, што овозможува акумулирано искуство во нивната експлоатација и во спроведувањето на противминските операции.

Според Запрјанов, оваа испорака е од исклучително значење за развојот на противминската дејност, со оглед на тоа што дел од постојната флота сè уште вклучува руски бродови од времето на Втората светска војна, кои повеќе не одговараат на современите оперативни барања.

Со оваа одлука, Бугарија го започнува петтиот проект за модернизација на својата армија.