Бугарски и украински митрополити ќе отслужат божествена Света литургија во Вселенската патријаршија

Делегација составена од бугарски владици моментално се наоѓа во Цариград. Митрополити од Бугарската патријаршија се во посета на Вселенската патријаршија, а предвидени се средби и со вселенскиот патријарх Вартоломеј, јавува БГНЕС.

Според orthodoxtimes.com, во Фанар се присутни и митрополити на Православната црква на Украина, предводени од митрополитот Епифаниј. Во патријаршискиот храм денеска се очекува двете архиерејски групи да отслужат Божествена Света литургија.

Овој настан е посебно значаен бидејќи Бугарската патријаршија сè уште официјално не ја признала автокефалноста на Православната црква на Украина. Вреди да се напомене дека на погребот на покојниот бугарски патријарх Неофит присуствуваше и митрополитот Киевски и на цела Украина Епифаниј.

Претстојното литургиско причестување е исклучително важен настан, особено ако се земе предвид дека Светиот синод на Бугарската патријаршија треба да избере нов патријарх на крајот на јуни. Покрај тоа, во саботата вечерта, Вселенскиот Патријарх приреди вечера за бугарските и украинските архиереи во Цариград, со што дополнително ја истакна важноста на овие настани и врски.