Бугарскиот патријарх Даниил ја заврши својата мирна посета на Јордан со молитва во православен храм во Аман

На крајот од својата мирна посета на Ерусалимската патријаршија, бугарскиот патријарх Даниил ја посети православната црква „Воведение на Пресвета Богородица“ во населбата Суејфија во Аман, Јордан. Заедно со ерусалимскиот патријарх Теофил Трети беа пречекани во храмот, каде што беше отслужена кратка молитва. Двајцата поглавари го посетија Богословскиот центар „Св. Игнатиј Богоносец“, каде што се запознаа со неговата дејност и со иницијативите што се спроведуваат во него. Во литија, црковната делегација ја посети и црквата „Св. Нектариј Егински“, каде што се поклони пред моштите на светецот што се чуваат таму, соопштија од Бугарската патријаршија, пренесува БНТ.

Свечениот прием продолжи во зградата на архиепископијата, а на него се придружија принцот Гази бин Мухамед – главен советник на кралот Абдула Втори за верски и културни прашања, и вицепремиерот Муханад Шехаде.

Кириакополскиот архиепископ Христофор – патријаршиски намесник во Аман, им посака добредојде на патријархот Даниил и на патријархот Теофил и сподели свои размислувања за мисијата на Црквата денес. Тој раскажа за активностите и иницијативите на архиепископијата, истакнувајќи дека христијаните во Јордан уживаат слобода и можат спокојно да го живеат својот духовен живот. Архиепископот Христофор посвети особено внимание на подготовките што земјата ги започнува за одбележувањето на две илјади години од Крштението Господово во 2030 година.

Патријархот Даниил ја изрази својата радост од можноста да биде меѓу браќата во Ерусалимската патријаршија, која за време на неговата мирна посета покажа вистинско гостопримство и љубов. Тој им посака на патријархот Теофил и на архиепископот Христофор Бог да им дава сила, здравје и благодат за да продолжат да ги извршуваат своите дела во полза на Црквата и на општеството. Патријархот истакна дека принцот Гази бин Мухамед покажува вистинска љубов на дело, помагајќи ѝ на Црквата и поттикнувајќи го поклоничкиот и културниот туризам во земјата.

На крајот од приемот, ерусалимскиот патријарх Теофил му се заблагодари на патријархот Даниил што ја оствари својата прва мирна посета на територијата на Ерусалимската патријаршија, истакнувајќи дека таа е историска не само за Бугарската патријаршија, туку и за древната Ерусалимска црква. Тој упати поздрави до свештенството и верниците на Бугарската православна црква и изрази надеж дека средбите и заедничките богослужења меѓу двете помесни цркви ќе бидат сѐ почести.

Патријархот Даниил ја посети и бугарската амбасада во Аман, каде што се сретна со амбасадорот Метин Казак и со вработените во бугарското дипломатско претставништво. Амбасадорот му раскажа на патријархот за настаните што ги организира амбасадата, како и за различните активности со кои го поддржува ширењето на бугарскиот јазик и култура. Бугарскиот патријарх отслужи водосвет и посака Бог да му биде поткрепа и помош во сѐ на бугарското дипломатско претставништво во Јордан, а по завршувањето на богослужбата подари и копија од чудотворната икона на свети Георги од Хаџидимовскиот манастир.

Бугарскиот патријарх посети и храм во јорданскиот град Фухејс и се сретна со кралот Абдула Втори.

Патријархот Даниил и црковната делегација предводена од него пристигнаа на 28 септември во Јордан, каде што ги посетија изворот на свети Јован Крстител и реката Јордан.

Бугарскиот патријарх и софиски митрополит Даниил пристигна на 25 септември во Израел, во својата прва мирна посета на Ерусалимската патријаршија, соопштија од Бугарската патријаршија. Посетата е на покана на ерусалимскиот патријарх Теофил Трети и со одлука на Светиот синод на Бугарската православна црква – Бугарска патријаршија (БПЦ-БП). Во составот на делегацијата се варненскиот и великопреславски митрополит Јован, неврокопскиот митрополит Серафим, мелничкиот епископ Герасим – главен секретар на Светиот синод, протоѓаконот д-р Дејан Коруноски, д-р Александар Смочевски – патријаршиски советник и преведувач, и други лица. Ерусалимскиот патријарх Теофил му го врачи на патријархот Даниил највисокото одликување на древната Патријаршија – орденот „Крст на Гробот Господов“.