Бугарското кисело млеко кандидат за нематеријално наследство на УНЕСКО

Бугарското кисело млеко е предложено за впишување на Листата на нематеријално културно наследство на УНЕСКО во заедничка кандидатура со Романија и Турција. Процедурата веќе е започната, а оценката се очекува наесен, по завршување на утврдената експертска постапка, јавува БНР.

Во досието Бугарија ја брани традицијата на производство и културното значење на киселото млеко, кое со векови е дел од секојдневието и обичаите на Балканот. Опишани се традиционалните техники на заквасување, како и социјалниот и културниот контекст, вклучувајќи ги верувањата за неговите здравствени и лековити својства. Во бугарската традиција, киселото млеко не е само храна, туку и дел од обичаи поврзани со благосостојбата и грижата за телото.

Директорот на Регионалниот музеј во Русе, проф. Николај Ненов, изјави дека пред две години Бугарија добила покана од Турција за учество во регионална иницијатива. Тогаш само бугарскиот тим успеал да ја подготви и поднесе документацијата, но поради големиот број кандидатури, таа не била разгледана. Сега, со учеството на Романија и Турција, постои можност за заедничка апликација со доволно време за целосна подготовка.

Доколку кандидатурата биде одобрена, киселото млеко ќе добие ново меѓународно признание за една од најпрепознатливите бугарски гастрономски традиции, која веќе е заштитена како европски производ со географско потекло.