Бугарското МНР по повод 6 Септември: Силната надворешна политика се гради врз национален консензус и единство

Силната надворешна политика се гради врз национален консензус и единство околу интересите на Бугарија, објави Министерството за надворешни работи на Република Бугарија на својата официјална страница по повод 6 Септември – Денот на Соединението на Кнежевството Бугарија со Источна Румелија.

„Токму денешниот празник покажува што можеме да постигнеме кога сме обединети околу заедничка цел“, се наведува во пораката на бугарското Министерство за надворешни работи.

Од Министерството посочуваат дека Соединението претставува лекција по државност и храброст.

„Тоа докажува дека решителноста и вербата во сопствените сили можат да го претворат националниот идеал во историско дело“, се истакнува во објавата.

Бугарското МНР повика духот на единството да се зачува и денес, „со одговорност кон Бугарија и кон поколенијата по нас“.

Пораката завршува со честитка по повод 6 Септември – Денот на Соединението на Кнежевството Бугарија со Источна Румелија.