Бургас го подготвува евроградчето за „Евровизија“ во близина на Морската станица

Голем простор во близина на Морската станица во Бургас се подготвува за евроградчето на „Евровизија“, каде за време на натпреварот се очекуваат концерти, музички програми и настани на отворено за илјадници посетители, јавува БНТ.

Од предложената локација веќе се отстранети големи количества железо од поранешни магацини на пристаништето. Министерот за транспорт и врски Георги Пеев презел обврска просторот наскоро целосно да биде расчистен, за да може локацијата да биде разгледана од претставниците на Европската радиодифузна унија.

Градоначалникот на Бургас, Димитар Николов, оцени дека местото е погодно поради близината до центарот, железничката и автобуската станица и Морската градина, како и поради полесната организација на јавниот превоз.

Во моментов се финализира изгледот на евроградчето, а државата најавува поддршка и за транспортната поврзаност на Бургас со Софија и Истанбул.

Според Пеев, ќе се работи на железничките и авионските врски, додека Николов најави разговори со авиопревозниците за дополнителни летови до и од аеродромот во Бургас.