Д-р Пламен Димитров: Помошта за Украина треба да биде поголема, „Нефтохим“ може да работи без руска нафта

Колку е поголема и поинтензивна помошта за Украина, толку се поголеми шансите за победа на Киев.

Опасност од гасна криза зимава нема, но цените на „синото гориво“ ќе бидат повисоки од сега. Сепак, тие ќе бидат прифатливи за бизнисот.

Ова во интервју за БГНЕС го вели д-р Пламен Димитров од Информативниот центар на Министерството за одбрана.

Со него ги коментираме ризиците во регионот на Црното Море по повлекувањето на Русија од договорот за жито.

„Во оваа ситуација од клучно значење е што нашата земја е членка на НАТО – најголемиот и најуспешен воено-политички сојуз деновиве. Тој е гаранцијата за безбедноста на Бугарија, која е дел од поголема конфронтација меѓу Русија и западниот свет“, нагласи експертот.

Тензиите се вжештија по одлуката на Москва да прогласи една голема зона како забранета за трговски бродови, одлука што влијае на дел од економската зона на Бугарија под изговор за воени вежби.

„Прво беше на десет дена, па за уште десет дена беше најавено затворање на овој простор. Постојат ризици за Бугарија, но нема непосредна закана дека нашата земја ќе биде нападната, вовлечена во војна или страдање“, категорично рече д-р Димитров.

Кога зборуваме за економската положба на Бугарија во црноморскиот регион, актуелно е прашањето за снабдување со нафта на единствената голема домашна рафинерија „Лукоил-Нефтохим“. Има отстапување од санкциите на ЕУ, со кои Бугарија може да увезува руска нафта до крајот на 2024. Прашање е што ќе се случи потоа, но тоа прашање може да дојде на дневен ред уште побрзо, бидејќи има предлог доставен до бугарскиот парламент да се откажеме од овој компромис до крајот на оваа година.

„Бугарија ќе мора да увезува нафта или преку Босфорот или да најде суровина некаде во регионот на Црното Море. Нефтохим ќе може да ракува и преработува неруска нафта бидејќи не е толку скапо да се увезува преку Босфорот. Мора да имаме предвид дека нафтениот терминал во „Росенец“ во Бургас може да прими мали танкери до 70 илјади тони, а тие без проблем минуваат низ Босфорот. Другата важна работа е што големи количини на неруска нафта влегуваат во регионот на Црното Море. Таа доаѓа од Казахстан и се движи по релација Тенгиз-Новоросијск. Станува збор за волумени од околу 50 милиони тони годишно“, вели аналитичарот.

Д-р Пламен Димитров предвидува дека во догледно време руската војна во Украина нема да заврши, бидејќи главниот фактор е што силите на двете завојувани страни се еднакви, а нивните позиции се апсолутно непомирливи.

„Нема начин да се усогласи позицијата на Украина за ослободување на сите окупирани територии со барањето на Русија овие четири региони, заедно со Крим, кој Москва го анектираше, да останат под нејзина контрола“, рече тој.

„Илузија е да се мисли дека војната ќе заврши затоа што Путин е тешко болен, или затоа што ќе биде соборен од власт, или затоа што руската економија ќе пропадне за месец или два или затоа што Русија ќе го преземе Киев. Ништо такво нема да се случи во наредните месеци“, предупреди д-р Димитров, додавајќи дека главната променлива на бојното поле е износот на западната воена помош.

„Колку е поголема оваа помош, толку побрзо се интензивира, толку се поголеми шансите Украина да ја заврши војната со победа. Русија веќе нема шанси да ги постигне првичните цели, туку резултатот се движи помеѓу нерешено и победа на Украина“, категорично изјави експертот од Информативниот центар на Министерството за одбрана. Тој додаде дека на долг рок изгледите за руската економија не се добри.

На прашањето дали постои опасност годинава да се случи гасна криза, д-р Димитров нагласи дека такво нешто нема да се случи.

„Европа ќе се снаоѓа и следната зима со природен гас, но цените ќе бидат малку повисоки од она што се во моментов. Сепак, овие ценовни флуктуации ќе бидат подносливи за индустријата. ЕК сакаше да воведе плафон од 180 евра за мегават час, но сега тоа изгледа бесмислено бидејќи цените се многу пониски“, вели д-р Пламен Димитров.