Денков во Израел: Ја имате нашата целосна поддршка, ние сме со вас, Хамас треба да се искорени за да има траен мир

Државата Израел и израелскиот народ ја имаат нашата целосна поддршка, ние сме со вас. Овој став го искажа бугарскиот премиер академик Николај Денков на средбите со премиерот на државата Израел Бенјамин Нетанјаху и со претседателот Исак Херцог за време на неговата еднодневна посета на Ерусалим, јавува БГНЕС. Дел од делегацијата предводена од академик Денков е и вицепремиерката и министерка за надворешни работи Марија Габриел, соопшти владината прес-служба.

„Знаеме колку се тешки времињата денес и затоа сме тука. Сите бевме шокирани од терористичките напади во кои загинаа толку многу невини луѓе во Израел“, му порача премиерот на Бугарија на својот израелски колега Нетанјаху. Академик Денков го увери претседателот на Државата Израел Исак Херцог дека нашата земја ќе обезбеди хуманитарна поддршка со се што е потребно, вклучително и испраќање медицински специјалисти. Можете да сметате на нас“, рече академик Денков.

Премиерот истакна дека е важно сите заложници да бидат ослободени што е можно поскоро, а претходно Меѓународниот комитет на Црвениот крст да добие итен пристап до нив. „Ги ценам вашите напори да ги заштитите животите на невините луѓе. На денешните дискусии видов дека давате се од себе во овие тешки околности“, рече академик Денков.

Бугарија е многу загрижена за тоа што се случува во Појасот Газа, знае колку е тешка ситуацијата во регионот и колку е важен развојот на војната за зачувување на мирот. „Ги разбираме вашите права да ја браните државата Израел и вашиот народ. Имате целосно право да се борите против терористите бидејќи тоа што тие го направија е незамисливо. Мора да се искорени „Хамас“ и целата негова воена и административна структура, бидејќи во спротивно нема да има траен мир“, рече академик Денков.

Премиерот и претседателот на државата Израел му се заблагодарија на бугарскиот премиер за непоколебливата поддршка од Бугарија.

За време на посетата на Ерусалим, премиерот се сретна и со роднините на киднапираните граѓани во Газа. „Ќе направиме се што можеме за да помогнеме. Ова е кошмар, човечноста е важна. Мораме да останеме заедно“, им се обрати академик Денков на присутните, откако ги слушна нивните приказни за тоа што се случило по почетокот на војната.