Џафери за УСБ-то од Груевски: Тоа е невистина што служи за дневна политика
Претседателот на Собранието, Талат Џафери, се огласи по информациите за наводно УСБ, кое деновиве е тема на престрелки меѓу експретседателот на ВМРО-ДПМНЕ, Никола Груевски, и актуелниот потпретседател на партијата, Александар Николовски.
Џафери ги демантира тврдењата на претседателот на ВМРО-ДПМНЕ, Христијан Мицкоски, дека експремиерот Никола Груевски нему и на лидерот на ДУИ, Али Ахмети, им дал УСБ и плик со документи, во кои наводно имало содржина за измени на Кривичниот законик.
На прашањето дали експремиерот Груевски им доставил УСБ и плик на Џафери и на Ахмети, а кои се однесувале на Кривичниот законик, Џафери рече:
„Никаква вистина нема дека претседателот на Собранието од експремиерот примил каков било материјал. Тоа е невистина, која само служи само за дневна политика. Собранието добива материјали од овластени предлагачи во форма што е пропишана со Деловникот. Понатаму, не би сакал да користам несоодветни зборови што ги заслужува таквата инсинуација, но им оставам на совеста на оние што шпекулираат со јавноста“, изјави Џафери.
