ЕК одобри 170 милиони евра помош за бугарските земјоделци поради високите цени на горивата и ѓубривата

Европската комисија ја одобри бугарската шема за државна помош во износ од 170 милиони евра за земјоделците погодени од зголемените цени на горивата и ѓубривата поради кризата на Блискиот Исток, јавува БГНЕС.

Шемата беше одобрена во согласност со Привремената рамка за државна помош при кризи на Блискиот Исток (METSAF), усвоена од ЕК на 29 април 2026 година.

Шемата ќе се применува до 31 декември 2026 година и има цел да го ублажи влијанието на зголемените цени на горивата и ѓубривата во земјоделството. Помошта ќе биде доделена во форма на директни неповратни средства. Шемата предвидува помош во ограничен износ, усогласена со зголемувањето на цените на горивата и ѓубривата, со максимален износ од 50.000 евра по претпријатие.

ЕК ја оцени шемата според правилата на ЕУ за државна помош и утврди дека таа е во согласност со условите, по што ја одобри.

METSAF ќе биде во сила до 31 декември 2026 година. Во текот на нејзината примена, ЕК ќе ги преиспитува содржината, опфатот и времетраењето на рамката, земајќи ги предвид настаните на Блискиот Исток и општата економска состојба, соопшти прес-службата на ЕК.