ЕНП бара вонредно сослушување на еврокомесарката Марта Кос поради обвинувања за соработка со југословенските тајни служби

Европската народна партија (ЕНП) побара одржување на вонредна седница на Комисијата за надворешни работи (AFET) во Европскиот парламент, на која ќе биде сослушана еврокомесарката за проширување Марта Кос во врска со обвинувањата за соработка со југословенските тајни служби од комунистичкиот период, јавува БГНЕС.

Сослушувањето би можело да се одржи веќе следната недела и ќе се фокусира на обвинувањата дека словенечката комесарка ги довела во заблуда европратениците за време на своите сослушувања во 2024 година, како и дека се наоѓа во конфликт на интереси во работата по досиејата за проширувањето кон Западен Балкан.

Заменик-претседателката на групата на ЕНП, Романа Томц, исто така од Словенија, ја формулираше позицијата на политичката сила во изјава за EUalive:

„Сакаме Марта Кос да објасни зошто ги довела во заблуда членовите на Европскиот парламент за време на своето сослушување во 2024 година. Постојат основани сомнежи дека поради своето минато комесарката е во конфликт на интереси. Таа треба да одговори на низа прашања за да ја заштити сопствената репутација и онаа на Европската комисија.“

Извори од ЕНП нагласуваат дека понатамошно одложување нема да биде дозволено, бидејќи случајот веќе не е внатрешнополитичко прашање на Словенија, туку го засега довербата во европските институции.

Од кабинетот на Кос одбиваат коментар за најавеното сослушување и повторуваат дека „на сите релевантни прашања било одговорено за време на постапката за потврдување“. Европската комисија, исто така, не дава официјален став, што ги засилува критиките дека претседателката Урсула фон дер Лајен штити свој политички назначен кадар.

Европратеници од различни политички групи неофицијално признаваат дека назначувањето било забрзано без темелна проверка на биографијата на Кос пред 1991 година.

БГНЕС објави на 13 март дека еврокомесарката за проширување Марта Кос се наоѓа во центарот на сериозен скандал. Архивски документи на словенечката Државна безбедност од крајот на 80-тите години, објавени од истражувачот Игор Омерза во книгата „Комесарката“, содржат оперативни разработки со кодни имиња „TARA“ и „BLANKA“, за кои се тврди дека се однесуваат на Кос. Во материјалите се опишува линија на работа поврзана со нејзиното назначување во „Дојче веле“ во Келн и последователни контакти со службите. Документите вклучуваат конкретни датуми, задачи и описи на активности, што им дава дополнителна тежина на обвинувањата, кои Кос ги негира.