ЕУ подготвува нови санкции против Русија
Министрите за надворешни работи на земјите од ЕУ денеска во Брисел се очекува да усвојат нови санкции против Русија поради киднапираните украински деца, соопшти европски дипломатски извор. Санкциите ќе опфатат голем број лица, пренесува БНР.
Една од главните теми на Советот за надворешни работи ќе биде и обезбедувањето на заемот од 90 милијарди евра за Украина, кој беше одобрен од ЕУ. На состанокот ќе присуствува и украинскиот министер за надворешни работи Андриј Сибига, кој ќе информира за состојбата и најитните потреби на земјата.
Министрите ќе разговараат и за ситуацијата на Блискиот Исток, вклучително и можностите за притисок за отворање на Ормутскиот теснец и слободен поморски сообраќај без дополнителни такси.
Средбата ќе започне со неформален појадок со министрите за надворешни работи од Западен Балкан.
На крајот од состанокот, високата претставничка на ЕУ за надворешна политика Каја Калас и еврокомесарката за проширување Марта Кос, заедно со Сибига и канадската министерка Анита Ананд, ќе бидат домаќини на состанок на меѓународната коалиција за враќање на украинските деца.
Бугарија на состанокот ја претставува новата министерка за надворешни работи Велислава Петрова.
