Европската комисија го заврши прегледот на законодавството на Украина и Молдавија за нивното приклучување кон Европската унија

Европската комисија го заврши прегледот на законодавството на Украина и Молдавија и верува дека до ноември Советот на Европската унија ќе може да ги отвори сите шест преговарачки кластери со двете земји. Ова го изјави еврокомесарката за проширување Марта Кос при пристигнувањето на состанокот на министрите за надворешни работи на земјите членки, јавува БНР.

„Ова е во интерес на сите“, истакна Кос. „Во последните три и пол години Украинците секојдневно се борат за да ја задржат Русија надвор од Европа. Во Молдавија граѓаните петти пат покажаа дека сакаат да останат на европскиот пат. Верувам дека земјите членки нема да го запрат овој процес, бидејќи тоа би ѝ помогнало на Русија и на нејзините прокси структури“, додаде таа.

Запрашана како ќе биде надминато унгарското вето против започнувањето на преговорите со Украина, Кос изјави дека Унгарија не се спротивставила на доделувањето кандидатски статус и изрази увереност дека проблемите можат да се решат.

„Ако Унгарија има грижи за унгарското малцинство во Украина, сето тоа може да се реши во првиот кластер. Пред неколку недели бев во регионот каде што живее унгарското малцинство и разговарав со негови претставници. Ниту еден не се пожали дека се во положба за која тврди унгарската влада“, изјави еврокомесарката.

Во однос на можната средба меѓу американскиот претседател Доналд Трамп и рускиот лидер Владимир Путин во Будимпешта, високата претставничка на ЕУ за надворешна политика и безбедност Каја Калас изјави дека е важно украинскиот претседател да има можност да разговара со Путин.

„Не е добро што некој за кого постои меѓународна потерница од Меѓународниот кривичен суд ќе дојде во европска земја. Но прашањето е каков би бил исходот. Ние сме многу јасни – Русија преговара само под притисок. Се надевам дека претседателот Трамп ќе го направи тоа“, изјави Калас.

Таа додаде дека се очекува оваа недела да биде постигнат договор за 19-тиот пакет санкции против Русија, како и за дополнителни мерки насочени кон руската „флота во сенка“.

„За жал, тоа нема да се случи денес, но ќе имаме состанок на лидерите во четврток, кога се очекува тие да ги усвојат новите санкции“, рече високата претставничка.