(Фото/Видео) Бугарските претстави „X“ и „Медеа“ ја освоија скопската публика на 19-то издание на „Скупифестивал“
Во рамките на 19-то издание на Меѓународниот театарски фестивал „Скупифестивал“, бугарскиот театар синоќа се претстави пред скопската публика со две исклучителни претстави. Настанот се одржа во Албанскиот театар во Скопје, во атмосфера која наликуваше на вистински празник на уметноста.
Со почеток во 19 часот, беше изведен перформансот „X“ од независниот театар „Јалта Арт Рум“ од Софија, по текст и во режија на Бојан Крачалов, во маестрална интерпретација на Васил Дуев – Туиг. Неговиот настап беше вистинско уметничко доживување. Со својата неверојатна енергија и потполна посветеност, тој успеа да предизвика силни емоции кај присутните. Секој негов гест и секоја изговорена реплика беа исполнети со искрена страст и длабочина.
По него, во 20:30 часот, следуваше спектаклот „Медеа“ од Еврипид, во продукција на Народниот театар „Иван Вазов“ од Софија, во режија на Деклан Донелан. Оваа претстава ја освои скопската публика со својата моќ и интензитет. Благодарение на извонредната режија и силната игра на ансамблот, класичната трагедија беше донесена на современ и длабоко емотивен начин. Особено впечатливо беше тоа што публиката стоеше околу актерите и стануваше дел од дејството, а нивната изведба беше толку интензивна и автентична, што публиката имаше чувство дека ја живее судбината на ликовите. Сцената и гледалиштето се сплотија во едно.
Во центарот на ова моќно дело блескаше Радина К’рџилова во улогата на Медеа. Нејзината интерпретација беше извонредна – полна со болка, страст и драматична сила. Таа ја прикажа сложеноста на ликот со толкава убедливост, што целата сала остана без зборови.
И двете претстави ја потврдија големината и уметничката моќ на бугарскиот театар. Од енергичната и возбудлива изведба на Васил Дуев – Туиг, до грандиозната и потресна „Медеа“ со маестралната Радина К’рџилова и целата фасцинантна трупа на Народен театар „Иван Вазов“ од Софија. Вечерта во Албанскиот театар во Скопје претставуваше вистински триумф на театарската уметност. Тоа беше искуство што долго ќе се памети – вечер во која театарот ги избриша границите меѓу сцената и публиката.
