(Фото) Во Охрид одржан четириесетдневниот помен на адвокатот Саво Коцарев

На Градските гробишта во Охрид вчера се одржа 40-ет дневниот помен на доајенот на адвокатурата во РС Македонија и поранешен титов затвореник Саво Коцарев.

На поменот присутни беа членови на неговото потесно семејство, негови пријатели и претставници на Генералното конзулство на Република Бугарија во Битола.

Саво Коцарев ќе остане во историјата како еден од последните претставници на борците за независна македонска држава, убеден демократ и голем непријател на титовизмот и сличните нему тоталитарни режими.

„Осуден бев за слобода на мислата, за разговор и изразена желба за самостојна Македонија, вон од границите на Југославија. Југославија, сеедно дали беше кралската на или титовата социјалистичка, за нас не беше слобода-таа беше ропство“, ќе изјави покојниот Коцарев во својот последен јавен настап од крајот на октомври минатата година, во видео снимено на настан организиран од организацијата на правници Iuridicaprima.