Францускиот министер за одбрана: Загриженост дека САД ќе ѝ отстапат сè на Русија, прв приоритет на САД е Кина
Франција е загрижена што новата американска администрација „ќе ѝ даде сè“ на Русија во мировните преговори во Украина, изјави синоќа францускиот министер за одбрана Себастијан Лекорни.
„Во време кога претседателот Трамп вели: „Треба да преговараме, треба да наметнеме мир со сила“, ние во Париз сме загрижени дека силата е само слабост“, рече Лекорни во интервју за француската онлајн телевизија BFMTV.
Откако Вашингтон укажа дека нема да има американски војници во Украина според можниот мировен договор и дека Украина нема да се приклучи на НАТО, Лекорни праша: „Па што имате во ракавот? и додаде дека она што загрижува е што американската администрација на крајот ќе и отстапи се на Русија.
Во интервјуто, Лекорни се осврна на телефонскиот разговор меѓу Трамп и рускиот претседател Владимир Путин, велејќи дека „заканата од Кина“ е повисок приоритет за САД отколку војната во Украина.
Францускиот министер се осврна на изјавата на американскиот министер за одбрана Пит Хегсет на министерскиот состанок на НАТО во Брисел, кој рече дека Кина во суштина е приоритет за САД.
„Тој дури ни кажа дека Американците не можат да управуваат со два конфликти во исто време“, рече Лекорни.
BFMTV потсети на растечките тензии меѓу Пекинг и Вашингтон поради американската поддршка за Тајван.
Во декември Американците го ограничија извозот на полупроводници во Кина со цел „да ја спречат способноста на Кина да стекнува и произведува технологии потребни за модернизација на нејзината војска“, објави француската телевизија, додавајќи дека многу американски генерали предупредуваат на можноста за војна меѓу Кина и САД во последните години.
