|

Граѓаните на Скопје поблиску до Армијата, голема посетеност на армискиот Отворен ден на Воениот стадион

Граѓаните на Скопје денеска на Воениот стадион имаа можност одблиску да се запознаат со опремата и возилата на Армијата, вклучувајќи ги и новите JLTV оклопни возила. Показна вежба имаа армиските Ренџери, а претставени беа специјалните сили, баталјонот на Воената полиција, Воено-медицинскиот центар, воздухопловниот ВИНГ, армиските кучиња.

Полковникот Васил Митевски од Командата за операции истакна дека му е чест што денеска граѓаните на Скопје можат да се запознаат со дел од армиската опрема и порача дека членството во НАТО е важно од безбедносен аспект, но и во однос на соработката со сојузниците.

„За нас како Армија членството во НАТО претставува една голема можност за соработка со сите НАТО партнери со цел зголемување на нашите способности, како и способностите коишто треба да ги исполниме во НАТО Алијансата“, рече полковникот.

Отворениот ден на Армијата се организира во рамки на одбележувањето на 4-годишнината од членството на Северна Македонија во НАТО и 75-годишнината од основањето на Алијансата. Досега беа организирани пет отворени денови во Струмица, Кавадарци, Штип, Тетово и Прилеп, денеска армијата е и во Скопје и Охрид, а утре завршниот отворен ден е во Кичево.

Слични Објави