Играорците од охридскиот ансамбл „Филиграни“ специјален гостин на фестивалот „Меѓународен ден на танцот“ во Гоце Делчев, Бугарија

Градот Гоце Делчев во Бугарија за 17-ти пат по ред ќе го одбележи Меѓународниот ден на танцот со дводневна програма на 25 и 26 април, соопштија од прес-центарот на општинската администрација, пренесува БТА. Настанот го организираат Општина Гоце Делчев и Народно читалище „Просвета – 1865“ и ќе вклучува дефиле, концертна програма и отворен час по бугарски ора.

Празникот ќе започне на 25 април (сабота) од 17:00 часот со традиционалното дефиле на учесниците, кое ќе помине од плоштад „Македонија“ до плоштад „Гоце Делчев“, информираат од општинската администрација. Веднаш потоа, од 17:30 часот, на плоштад „Гоце Делчев“ ќе се одржи заеднички концерт на играорните друштва од Бугарија и странство, кои се учесници во фестивалот.

На 26 април (недела) од 10:30 часот кај летниковецот во Градскиот парк ќе се одржи отворен час за изучување на бугарски ора. Наставата ќе ја води Данаил Атанасов.

Специјални учесници во овогодишното издание се играорците од ансамблот „Филиграни“ од Охрид, Република Северна Македонија. Во дефилето ќе се вклучат и претставници на детски и образовни установи. Организаторите посочуваат дека секој заинтересиран може да се приклучи на поворката, доколку располага со народна носија или облека со фолклорни мотиви.

Во 2025 година, во одбележувањето на Меѓународниот ден на танцот во Гоце Делчев учествуваа 13 танцови состави, а специјални гости на настанот беа Фолклорниот танцов ансамбл при Општина Нилуфер, Бурса (Турција) и Академијата „Еуроарт“ од Штип (Република Северна Македонија).