Илјадници кукери ќе продефилираат во Благоевград на Фестивалот на сурвакарските игри
Илјадници кукери во традиционални и атрактивни костими ќе продефилираат денеска во центарот на Благоевград на Фестивалот на сурвакарските игри. Седумнаесет локални групи и една група од Петрич ќе претстават обичаи и ритуали карактеристични за регионот, јавува Радио Бугарија.
„Ѕвонење на чанови, динамични композиции и вешто пресоздавање на древните традиции ќе ја претворат главната пешачка улица „Тодор Александров“ и плоштадот „Георги Измирлиев“ во своевидна сцена на живото наследство, пренесувано и зачувувано низ генерациите“, најавуваат организаторите од Општина Благоевград.
Фестивалот ќе обедини учесници од различни возрасни групи – од деца кои за првпат стапнуваат на патот на традицијата, до повозрасни кои ги чуваат и пренесуваат вековните обичаи. Стручно жири ќе ги награди најдобрите настапи во различни категории, оценувајќи автентичност, визуелен впечаток и сценско присуство.
