ЈСП „Скопје“: Скопјани нема да останат без јавен превоз, вработените ќе добијат плата
Скопјани нема да останат без јавен превоз информираат од ЈСП „Скопје“ после најавата на вработените дека доколку не добијат плата ќе престанат да ги извршуваат работните обврски.
– Вработените во наредниве денови ќе ја добијат заслужената плата, нема да дозволиме скопјани да останат без јавен превоз. Веруваме дека централната власт и дел од општините ќе ги исплатат заостанатите обврски кои ги имаат за испорачаната услуга од страна на ЈСП за организиран превоз за одредени категории патници, средства со кои се исплаќа платата за вработените во ЈСП.
Очекуваме дека час поскоро ќе ги подмират минатогодишните долгови и тековните обврски за да не се доведе во прашање редовната работа на претпријатието – децидни се од ЈСП „Скопје“.
Од ЈСП „Скопје“ велат дека, и покрај тешката ситуација, на која никој во државата не остана имун, тие како претпријатие работат за јавниот превоз како што велат да продолжи да функционира без проблеми во интерес на сите негови корисници.
– Во меѓувреме, и покрај сите околности, економската криза и констатниот пораст на цената на горивата, висината на цената на билетите остана иста, а нема редукции на возниот ред. Во изминативе пет месеци, откако актуелниот в.д. директор ја презеде функцијата, и покрај сите околности и мултимилионските долгови во кое е затекнато претпријатието, се успеа за краток временски период да се решат повеќе затекнати проблеми. Целосно се оспособи и стави во возна состојба целиот возен парк, се презедоа конкретни мерки за надминување на проблемите со нефункционалноста на инвалидските рампи, на 50 возачи им се реши долгогодишниот статус, односно добија вработувања на неопределено време – објаснуваат од ЈСП „Скопје“.
