Кирило-Методиевскиот научен центар при БАН годинава ќе одбележи три годишнини
Кирило-Методиевскиот научен центар при БАН (КМНЦ-БАН) одбележува три значајни годишнини во 2023 година. Ова го соопшти научната институција на својата веб-страница.
Тоа се 1160 години од создавањето на словенската писменост, 110 години од формирањето на Климентовата комисија (12 декември 1913 година) и 60 години од возобновувањето на Кирило-Методиевската комисија (22 мај 1963 година).
Во програмата на празнувањата КМНЦ-БАН предвидува и свечено чествување на Успението на Св. Кирил и Успението на Св. Методиј, подготовка на изложба, јубилеен календар, организирање на натпревари за ученици, телевизиски и радио емисии и многу други иницијативи.
Централен настан на јубилејната година ќе биде меѓународната научна конференција „Кирило-Методиевското дело во научната и културната меморија“, што ќе се одржи од 22 до 24 мај во Софија. Јубилејната година свечено ќе биде затворена на 25 ноември – денот на Успението на Св. Климент Охридски.
