|

Макрон: Вучиќ мора да го осуди нападот на Косово

Францускиот претседател Емануел Макрон изјави во Тирана дека очекува српскиот претседател Александар Вучиќ остро да го осуди неодамнешниот напад на северот на Косово.

„Одговорност на претседателот Вучиќ е најостро да ги осуди настаните од 24 септември“, рече Макрон на прес-конференцијата заедно со албанскиот премиер Еди Рама во Тирана, пренесува агенцијата Бета.

Тој додаде дека одговорност на Вучиќ е да „придонесе за повторно воспоставување мир на границата“.

Францускиот претседател ги повика Белград и Приштина да покажат одговорност за да се смират тензиите.

„Очекувам одговорност од српскиот претседател, а истото го очекувам и од косовскиот претседател и премиер“, рече Макрон.

Тој рече и дека Франција ја суспендирала визната либерализација за Косово бидејќи не се почитува дадениот збор.

Според Макрон, се очекува Косово и Србија повторно да организираат локални избори во општините на северот на Косово и учество на локалните Срби во овие институции, а потоа и признавање на Заедницата на српските општини од страна на косовските власти. Тој додаде дека очекува двете страни да се посветат на ова, велејќи дека тоа е „услов за мир во целата област“.

Во напад на вооружените напаѓачи врз косовската полиција на 24 септември во Бањска загинаа еден косовски полицаец и тројца вооружени српски напаѓачи.

Портпаролот на ЕУ Петер Стано објави дека специјалниот пратеник на Европската унија за дијалог меѓу Белград и Приштина, Мирослав Лајчак и американскиот пратеник за Западен Балкан, Габриел Ескобар, во сабота доаѓаат во посета на Белград и Приштина.

Заедно со нив во посета на двете страни доаѓаат и главните советници на лидерите на Франција, Германија и Италија, Емануел Боне, Јенс Плоетнер и Франческо Тало.

Слични Објави