Мицотакис му се закани на Мицкоски со „непријатно прво искуство“ доколку не го почитува Договорот од Преспа

Грчкиот премиер Киријакос Мицотакис го предупреди Христијан Мицкоски дека ќе се соочи со „непријатно прво искуство“ на состанокот на НАТО во Вашингтон во јули, доколку не го почитува договорот од Преспа, пренесува БГНЕС.

„Во однос на Скопје, мојата порака до кандидатот за премиер е многу јасна. Заврши предизборниот период. Договорот од Преспа мора да се почитува. Нека даде категорична изјава кога официјално ќе ја преземе премиерската функција дека го почитува Договорот од Преспа“, изјави Мицотакис за грчката телевизија „Антена“, мислејќи на Мицкоски.

„Во спротивно, единственото нешто што ќе може да го постигне е едно многу непријатно прво искуство кога сите заедно ќе се сретнеме во Вашингтон, на 75-годишнината од НАТО, на почетокот на јули“, додаде грчкиот премиер и повтори дека средбата на врвот ќе го постави конкретното прашање.

Мицотакис посочи дека смета дека „народот во Северна Македонија е пријателски настроен“.

На крајот на краиштата, „ако сакаат да се доближат до Европа, патот кон Европа оди преку Грција и преку добрите односи со Грција“, додаде тој и нагласи дека истото важи и за Албанија.

На прашањето дали се разговара за можноста Грција да наметне вето на двете земји кон Европската унија, Мицотакис одговори:

„Мислам дека нема да мора да се дојде до тоа, бидејќи сигурен сум дека логиката на крајот ќе надвладее. Но, мислам дека бев сосема јасен“.

БГНЕС потсетува дека лидерот на ВМРО-ДПМНЕ, Христијан Мицкоски, вети дека неговата земја ќе ја нарекува „Македонија“ и ги повика грчките политичари „да не се однесуваат како талибанците“ во однос на Договорот од Преспа.

Мицкоски денеска ќе добие мандат за состав на влада од претседателката Гордана Силјановска-Давкова. За време на својата заклетва на 12 мај, Силјановска го употреби само името „Македонија“ наместо официјалното име – Република Северна Македонија, што е прекршување на Договорот од Преспа. Тоа предизвика меѓународен дипломатски скандал.

Договорот беше потпишан на 17 јуни 2018 година во селото Нивици на брегот на Големото Преспанско Езеро од тогашните министри за надворешни работи на двете земји, Никос Коѕиас и Никола Димитров. Договорот требаше да стави крај на долгогодишниот спор за името на Македонија меѓу властите во Скопје и Атина.